আমুল ব্ৰেণ্ডৰ অধীনত গাখীৰৰ সামগ্ৰী বিক্ৰী কৰা গুজৰাট সমবায় গাখীৰ বিপণন ফেডাৰেশ্যনে প্ৰতি লিটাৰ গাখীৰৰ মূল্য ২ টকা বৃদ্ধি কৰাৰ সিদ্ধান্ত ঘোষণা কৰিছে।
এই মূল্য আজি ৩ জুন, ২০২৪ সোমবাৰৰ পৰা সমগ্ৰ দেশৰ সকলো বজাৰতে কাৰ্যকৰী হ’ব। GCMMFৰ তথ্য অনুসৰি গাখীৰৰ মুঠ কাৰ্যকৰী আৰু উৎপাদন ব্যয় বৃদ্ধিৰ পৰিপ্ৰেক্ষিতত সোমবাৰৰ পৰা প্ৰতি লিটাৰত সকলো ধৰণৰ আমুল গাখীৰৰ মূল্য ২ টকাকৈ বৃদ্ধি কৰা হৈছে।
GCMMFএ এক বিবৃতিত কয় যে প্ৰতি লিটাৰত ২ টকা বৃদ্ধিৰ অৰ্থ হ’ল MRP ৩ৰ পৰা ৪ শতাংশ বৃদ্ধি, যিটো গড় খাদ্য মুদ্ৰাস্ফীতিতকৈ বহু কম। একে সময়তে GCMMFএ কয় যে ২০২৩ চনৰ ফেব্ৰুৱাৰী মাহৰ পৰা আমুলে মূল বজাৰত আমুলৰ সতেজ গাখীৰৰ দাম বৃদ্ধি কৰা নাই।
