মঙলবাৰে নিশা অহা বৰষুণৰ ফলত হায়দৰাবাদৰ বাচুপল্লী অঞ্চলৰ ৰেনুকা এলাম্মা কলনীত দেৱাল ভাঙি ৭ জন লোকৰ মৃত্যু হয়। দুৰ্ঘটনা সংঘটিত হোৱাৰ লগে লগে সমগ্ৰ অঞ্চলটোত হুলস্থুলীয়া পৰিৱেশৰ সৃষ্টি হয়।
স্থানীয় ৰাইজে আৰক্ষী আৰু প্ৰশাসনৰ বিষয়াক খবৰ দিয়ে। তথ্য লাভ কৰাৰ পিছতে আৰক্ষী আৰু বিষয়াসকলে সেই স্থানত উপস্থিত হৈ সাহায্য আৰু উদ্ধাৰ অভিযান আৰম্ভ কৰে। গভীৰ নিশাৰ পৰা চলি থকা উদ্ধাৰৰ কাম বুধবাৰে পুৱালৈকে অব্যাহত আছে।
উদ্ধাৰ কৰ্মীয়ে জনোৱা মতে, ধ্বংসাৱশেষৰ পৰা ৭টা মৃতদেহ উদ্ধাৰ কৰা হৈছে। মৃতদেহ দুটা মৰণোত্তৰ পৰীক্ষাৰ বাবে মহানগৰীৰ গান্ধী চিকিৎসালয়লৈ প্ৰেৰণ কৰা হৈছে। একে সময়তে নিহত লোককেইজন ওড়িশা আৰু ছত্তীশগড়ৰ বাসিন্দা বুলি চিনাক্ত কৰা হৈছে।
আৰক্ষীয়ে জনোৱা মতে, নিহত কেইজনৰ ভিতৰত আছে তিৰুপতী ৰাও মাজী (২০), শংকৰ (২২), ৰাজু (২৫), খুশী, ৰাম যাদৱ (৩৪), গীতা (৩২) আৰু হিমাংশু (১৪)। মৃতকৰ সংখ্যা বৃদ্ধি পাব পাৰে বুলি আৰক্ষীয়ে জানিবলৈ দিয়ে। উল্লেখ্য যে,উক্ত ঘটনাৰ উপৰিও ৰাজ্যখনৰ বিভিন্ন স্থানত অন্য ৭ জনকৈ লোকৰ মৃত্যু হয় ৷